電話響了！
我:你好，乜乜診所
對方係一位女士:我今日帶個女嚟睇過醫生嘅，十二歲嗰個～
我翻查紀錄:係咪乜乜乜啊？
佢:係呀
我:乜嘢事呢？
佢:你啲藥食到我個女「溫溫燉燉」，佢聽日考試咁點算？
我:佢啲藥食完係會眼瞓㗎～
佢:唔係眼瞓呀佢，係「溫溫燉燉」呀！佢咁「溫溫燉燉」聽日一定考得差啦！
我:…咁要唔要換隻冇咁眼瞓嘅收鼻水藥俾佢啊？
佢:我都話唔係眼瞓囉！係「溫溫燉燉」呀！食到佢蠢咗咁呀！點考試呀？你話呀？「溫溫燉燉」點考呀？拉低哂啲分你話點呀？
我唔知可以點啊，我都懷疑我娘成日俾蠢人丸我啪，所以先搞到咁呀，我可以同邊個投訴？
我:藥就唔會食到人蠢咗嘅…
佢:乜嘢唔會呀！佢未食你啲藥之前仲好精神，溫書都入到腦㗎！食完就「溫溫燉燉」，食到蠢哂！
我:佢應該眼瞓要休息啫，你俾佢休息吓先，病除咗要食藥之外，仲要配合休息㗎～
佢:我講咗好多次啦喎！佢唔係眼瞓呀！
我:你不如問吓佢係咪好攰想瞓覺？
佢隔電話嗌:囡！你係咪食藥食到「溫溫燉燉」呀？
溫你妹的！我叫你問東，你問阿西？你個人咁西化嘅？
大氣電波中嘅佢，得唔到阿囡嘅回應…我相信應該係瞓著咗…
佢:你聽吓！應都唔應呀！ 「溫溫燉燉」到咁啦！
我:你俾佢抖吓啦，瞓醒就好好多㗎啦～
佢:佢唔駛瞓㗎！佢聽日考試呀！
…阿囡，你仲有冇力幫我一個忙？介唔介意起身綑綁你老母，牛皮膠紙封口？你想瞓得安安落落，就聽姨姨話呀！
Search